AZAM SASA YAAMUA KUWEKA WAZI KUHUSU MESSI KWAMBA ITAMSAJILI IWAPO...

Hatimaye Azam FC wamefichua rasmi kuwa, wanamvizia kiungo wa Simba, Ramadhani Singano ‘Messi’ na kwamba kama Msimbazi wakimuacha tu, basi wao watamsajili kwa gharama yoyote kwa kuwa wanajua ana kiwango kizuri.

Messi hivi sasa yupo kwenye mgogoro na Simba kuhusiana na suala la mkataba. Simba inasema ina mkataba naye hadi mwakani, wakati yeye anajua unaisha mwezi ujao huku TFF ikishindwa kutatua sintofahamu hiyo.

Hivi karibuni Messi alionekana katika ofisi za Azam FC akirandaranda, jambo ambalo lilitafsiriwa kuwa atakuwa amekwenda kusaini mkataba wa kuitumikia timu hiyo.

Mkurugenzi Mtendaji wa Azam FC, Saad Kawemba amesema kuwa Messi ni mmoja kati ya wachezaji wazuri hapa Bongo na iwapo Simba watamuacha, wapo tayari kumsajili kwa kuwa ana uwezo.

“Messi alikuwa na matatizo na klabu yake kwa sasa ni vyema akamalizana na uongozi wake huo ili kuweza kujua hatma yake. Ni mmoja kati ya wachezaji wazuri.

“Iwapo ataanguka kwa kuachwa na Simba basi tupo tayari kumsajili,” alisema Kawemba.