MINZIRO AWAAMBIA; MSUBIRINI MWAIKIMBA MPYA LIGI KUU

Kocha Mkuu wa JKT Ruvu, Fred Felix Minziro, amefunguka kuwa, licha ya wadau kusema mshambuliaji wake Gaudence Mwaikimba umri umekwenda, watu watamshangaa atakapong’aa chini yake msimu ujao.

Mwaikimba ambaye ni mchezaji mkongwe aliyewahi kuichezea Yanga misimu kadhaa hapo nyuma, alitemwa na Azam FC hivi karibuni baada ya kuitumikia kwa miaka miwili.

Minziro alisema kuwa usajili wa Mwaikimba katika kikosi chake utamaliza tatizo la ushambuliaji kutokana na kuwa butu na kudai kuwa kiwango cha mchezaji huyo kilibadilika na kuwa bora katika kipindi cha mwisho wa msimu wa ligi.

“Mwaikimba ni mchezaji mzuri na nina imani kuwa nikiwa naye atarudi katika kiwango chake cha zamani kama ilivyokuwa Yanga na timu nyingine kwani ni mchezaji mwenye kiwango kizuri, ndyio maana nimemsajili.

“Kama utakumbuka mwishoni mwa ligi alionyesha kiwango kizuri sana licha ya hapo nyuma hakuwa vizuri lakini naamini atabadilika na kuwa tishio,” alisema Minziro ambaye timu yake ilimaliza katika nafasi ya nane msimu uliopita.