BAO BOMBA LAMPA UHAKIKA WA KIONGERA KUREJEA KIKOSINI SIMBA

Bao safi alilofunga mshambuliaji Paul Modo Kiongera dhidi ya Muhoroni Youth, limemhakikishia nafasi ya kurejea Simba.

Kiongera ameifungia KCB bao safi katika mechi ya Ligi Kuu Kenya juzi ambayo ilimalizika kwa ushindi wa mabao 3-0.

Bao hilo la Kiongera katika mechi lilishuhudiwa na baadhi ya wajumbe wa Kamati ya Utendaji ya Simba ambao waliamua kumfuatilia.

Kama haitoshi, baadhi ya wajumbe hao wa kamati ya Utendaji ya Simba walikuwa wakimfuatilia Kiongera wakiwa jijini Nairobi.

“Kweli kwa bao lile safi, tena akiwa amecheza dakika 90, hakuna hofu tunamrudisha,” alieleza mmoja wa wajumbe wa kamati hiyo.

Simba walikuwa wakimfuatilia Kiongera kwa ukaribu ili kupata uhakika wa uchezaji wake kabla ya kuamua wamrudishe kikosi au la.

Kiongera alipelekwa KCB kwa mkopo mara baada ya kuumia na baadaye kwenda kutibiwa nchini India.

Awali alikuwa akicheza dakika chache, tena akitokea benchi lakini sasa anaonekana ‘ameshakuwa mtamu’, hivyo kuanza kucheza dakika nyingi.