JULIO AKICHIMBIA KIKOSI CHAKE KUHAKIKISHA ANATISHA LIGI KUU

Kocha wa Mwadui FC ya mkoani Shinyanga, Jamhuri Kihwelo  ‘Julio’, ameamua  kujichimbia  mafichoni na timu yake kabla ya  kuanza msimu mpya  ili kuhakikisha anafanikiwa kuwa na ushindani mkubwa msimu ujao.

Mwadui FC imepanda daraja msimu uliopita ikiwa ni miongoni mwa timu nne zilizopanda daraja, zikiwemo Majimaji ya Songea, African Sport ya Tanga na Toto Africans ya jijini Mwanza.

Julio amesema kuwa ameamua kukificha kikosi chake kuhakikisha kinaiva kabla ya kuanza msimu mpya wa ligi kuu.

“Kwa sasa tupo mafichoni tukiwa katika ‘Pre Sesons’ kabla ya kuanza kwa msimu mpya, nikiwa nawapatia mazoezi mazito wachezaji wangu, hatutaki mtu yeyote ajue.

“Tunajiandaa kwa ajili ya kuweka kambi nje ya nchi hata muda wa siku 10 na mambo yakikamilika, tutatoa taarifa juu ya nini tunakifanya, tutacheza mechi za kirafiki hapo baadaye lakini kwa sasa bado tunaendelea na mazoezi kwanza,” alisema Julio.