KUTOKA DRC, MAONI YA SAMATTA, MUDA MCHACHE KABLA YA DERBY YA ILALA, SIMBA VS YANGA

Na Saleh Ally

Mshambuliaji wa TP Mazembe, Mbwana Samatta amesema mechi kubwa za watani kama hii ya leo inayowakutanisha Simba na Yanga, hazina presha kubwa kwa wachezaji.

Akizungumza na SALEHJEMBE, Samatta ambaye aliwahi kukipiga Simba, amesema mechi hiyo zaidi inakuwa na presha kubwa kwa makocha pamoja na mashabiki.

“Utaona wachezaji angalau kidogo wanaweza kutulia na kufanya vitu vizuri, lakini kwa makocha pamoja mashabiki kunakuwa na presha kubwa sana,” alisema Samatta mbaye kwa sasa ni kati ya washambuliaji gumzo.

“Tena naona kuna wachezaji wengine hupenda sana kuwa kwenye vikosi vya mechi hiyo kutokana na ladha tofauti kabisa ukilinganisha na mechi nyingine.”

Akizungumzia kuhusiuana na ishu ya Simba kuonekana kutawala pbano hilo la watani huku Yanga ikionekana kushindwa karibu kila wanapokutana katika miaka hivi karibuni, alisema:

“Nadhani Yanga wanapokea presha zaidi kutokana na jinsi kila wakati wanapokutana na Simba, kikosi chao kinaonekana kuwa bora zaidi ya Simba.”

Mechi hiyo itaanza saa 10 kamili, muda mchache kutoka sasa na tutakuwa tukiwaletea maendeleo ya uwanjani kwa dakika zote 90.