PIGO LA KICHWA CHA NGOMA KWA KESSY, TFF IBADILI KANUNI ZAKE…

MECHI ya watani ilikuwa ikisubiriwa kwa hamu kubwa na mashabiki wa soka nchini. Sasa ni uhakika, kwamba Yanga wameshinda kwa mabao 2-0 na wanaendelea kusherekea.

 Simba waliokuwa wababe wa Yanga, wamepoteza ile sifa yao kwamba wakikutana na watani wao, kwa ulaini wenyewe ‘wanajipigia’ tu. Sasa hakuna tena, inabidi wasubiri hadi watakapokutana mzunguko wa pili.

Mechi ilikuwa nzuri, hakika Simba walionyesha soka safi hasa katika kipindi cha kwanza lakini wakashindwa kuzitumia nafasi nzuri katika kipindi cha kwanza ambazo zingeweza kuwapa matokeo tofauti.

 Lakini Yanga wakaonyesha kweli wana wachezaji wengi wazoefu ambao waliweza kuihimili presha hiyo ya Simba hadi walipofanikiwa kufunga na baadaye kuyabadili kabisa mambo hadi walipoibuka na ushindi.

Kitu kizuri ni kwamba asilimia 99, watu wameondoka hata bila kuingia kwenye tafrani na ninaamini walifika nyumbani salama ambalo ni jambo jema.

Kikubwa ninacholenga leo, si kigeni na mara kadhaa nimekuwa nikizungumzia au kukikemea, mchezo wa kihuni, tena uhuni wa kijinga.

Nianze na kukumbushia mambo kadhaa ambayo hata nilipoyazungumzia nilionekana ninaitetea timu fulani ingawa sioni haja ya kujitetea katika hilo.

Kipindi kile yule beki wa Ruvu Shooting, George Michael alipomkaba Amissi Tambwe wa Yanga. Lakini unakumbuka beki Juuko Murshid wa Simba alipompiga kiwiko mchezaji wa Mgambo kama sijakosea.

Kumekuwa na matukio mengi ya namna hiyo ambayo si ya kiungwana na yanaendelea kujitokeza kwa kasi kwenye mchezo wa soka nchini.

Juzi, mshambuliaji wa Yanga, Donald Ngoma, licha ya kuwa ni mrefu mara moja na nusu kwa beki Hassan Kessy wa Simba, aliinama na kumpiga kichwa wakiwa hata hawagombei mpira.

Katika hali ya kawaida kabisa, mwamuzi mmoja, hasa kati ya hawa wawili, mmoja wao atakuwa aliona, yule wa kati au msaidizi wa kwanza.

Lakini ajabu, hakuna hatua iliyochukuliwa na kunakuwa hakuna ushahidi wa kumkamata mwamuzi huyo na kumlazimisha kuwa aliona. Anaweza kufanya hivyo yaani kujikausha ili kuepusha lawama kwamba aliharibu mchezo.

Mwamuzi Israel Nkongo inawezekana aliona lakini mawazo kwamba mchezo ni mapema mno, au watu hawawezi kuamini kama kweli Ngoma alifanya vile basi ikachangia yeye kujikausha, jambo ambalo ni baya kabisa kama kweli atakuwa aliona.

Lakini kuwasaidia Nkongo na wenzake kwa kuwa ni binadamu, TFF sasa inalazimika kurekebisha kanuni zake ziwe na makali zaidi kwa wachezaji wenye uchezaji wa kihuni, wa kijinga, usio wa kiungwana na wa kibabaishaji kama alioufanya Ngoma.

Mimi pia ninaweza kuwa kama Nkongo kama kweli hakuona tukio hilo. Kwamba huenda kuna matukio mengine ya kijinga na yasiyo ya kiungwana yalijitokeza.

Si sahihi hata kidogo, mchezaji kumpiga mwenzake pigo lisilo la kimichezo, tena wakiwa bila mpira. Hivi hawa wachezaji wa kigeni nao ndiyo wanachokileta hapa?

Ngoma ni mchezaji mwenye uwezo mzuri, lakini kama ataendelea hivyo, atafeli na mwisho ataacha wengine aliowakuta wakitamba. TFF lazima ikubali kwamba huu ndiyo wakati kanuni zinaweza kubadilika na wakaanza kutumia picha za video kufanya uamuzi na kutoa adhabu kwa watu wenye tabia chafu zisizokuwa za kimichezo.

TFF inaweza kuwa na uhakika wa matumizi wa kanuni hiyo kwa kuwa sasa kuna Azam TV ambayo inaonyesha mechi za Ligi Kuu Bara tena kwa ufanisi mkubwa huenda hata kuliko ilivyokuwa zikionyesha runinga nyingine zikiwemo za nje.

Azam TV ni wadhamini wa Ligi Kuu Bara. TFF wanaweza kuzungumza nao na kuchukua karibu kila mechi inayoonyeshwa na kuifanyia kazi kama kuna malalamiko au la.

Najua walitumia picha za Championi kumpa adhabu beki Michael kutokana na mchezo wake usio wa kiungwana dhidi ya Tambwe msimu uliopita.

Bado kuna haja ya kuongeza ukali wa adhabu kwa kubadili kanuni ili ikiwezekana kuondoa kabisa uhuni ‘vumbi’ unaofanywa katika mechi za Ligi Kuu Bara.