SIKILIZA HII SIMBA, MGAMBO WANAVYOPIGANA MKWARA

Makocha wa timu za Simba na Mgambo, wamejinasibu kuwa, ni lazima timu zao ziibuke na ushindi kwenye mchezo wa Ligi Kuu Tanzania Bara, leo Jumatano.

Mgambo watakuwa wenyeji wa Simba kwenye Uwanja wa Mkwakwani leo, ukiwa ni mchezo wa pili wa Ligi Kuu Tanzania Bara, baada ya michezo ya wikiendi iliyopita.

Katika michezo iliyopita, Simba walifanikiwa kuichapa African Sports bao 1-0 huku Mgambo wakitoka sare ya bao 1-1 dhidi ya Ndanda ya Mtwara.

Akizungumza na Championi Jumatano, huku akionyesha kujiamini, Kocha wa Mgambo, Bakari Shime, alijinadi kuwa lazima wawakalishe Simba kwa kuwa vijana wake wapo vizuri.

“Mgambo ni timu inayoundwa na vijana tuliowakuza wenyewe, hatuhitaji gharama kubwa kwa kuwa tunaweza kukuza vipaji kila mara na vikafanya vizuri.

“Nimeshawaambia vijana wangu kuwa, wanatakiwa kuhakikisha wanaibuka na ushindi kwenye mchezo huu, Simba kwetu ni timu ya kawaida sana na naamini kuwa tunaimudu,” alisema Shime.

Wakati kocha huyo akisema hivyo, yule wa Simba, Dylan Kerr, alisema anaamini kuwa timu yake ni bora na ushindi dhidi ya Mgambo ni kitu ambacho wamejipanga nacho.

“Mimi hao Mgambo sijawahi kuwaona, lakini sipati shida japokuwa nasikia wanaisumbua sana Simba wanapokutana nayo, ila sisi tumejipanga kwa ushindi.

“African Sports niliwaona kabla ya mchezo, hivyo hawakunisumbua sana, lakini na hawa hawanitishi hata kama sijawaona wakicheza,” alisema Kerr.