LOGA AONDOKA KENYA, AREJEA KWAO CROATIA, ASEMA ANAITAKA SIMBA TENA

Kocha wa zamani wa Simba, Zdravko Logarusic, ameachana na Klabu ya FC Leopards ya Kenya na sasa hana kazi lakini ameomba kazi kwa klabu yake ya zamani Wekundu wa Msimbazi.

Logarusic, raia wa Croatia, alijiunga na Leopards baada ya kuachana na Simba msimu uliopita ambako hata hivyo, ameondoka baada ya matatizo ya kiuongozi klabuni hapo.

Logarusic amesema ameondoka Leopards kutokana na kuchoshwa na matatizo ya kiuongozi katika kutimiza mambo yaliyomo kwenye mkataba wake na sasa hana timu.

“Nimeondoka FC (Leopards) na sasa nipo huru, ninaweza kurudi Tanzania na kuifundisha Simba kama inawezekana.

“Nitajaribu kuwasiliana na uongozi wa Simba ili nirudi Tanzania kuendelea na kazi yangu, najua bado nina kitu cha kuipa Simba kama nikielewana na uongozi,” alisema Logarusic.

Ndani ya Simba kwa sasa tayari Kocha Dylan Kerr ameshasema anaondoka kutokana na jinsi mwenendo wake na uongozi ulivyo, wakati naye akilalamikiwa kwa timu kucheza soka bovu licha ya kupata ushindi.