BAADA YA URA KUICHAPA MTIBWA, JEBA ABAKI WA MWISHO, AKOSA MEDALI BAADA YA FAINALI

Kiungo nyota wa Mtibwa Sugar, Ibrahim Jeba amekosa medali baada ya fainali ya Kombe la Mapinduzi ambayo URA wa Uganda wameibuka mabingwa kwa kushinda kwa mabao 3-1.

Jeba alikuwa mchezaji wa mwisho jukwaani kukabidhiwa medali ya shaba, lakini alipofika kwa mgeni rasmi zilikuwa zimeisha, hivyo akaamua kuondoka zake.

Haijajulikana mara moja kama kuna mtu mwingine wa Mtibwa Sugar “alizamia” na kuchukua medali ya jeba aliyeipeleka timu hiyo fainali baada ya kufunga bao pekee wakati Mtibwa ikiilaza Simba bao 1-0 katika mechi ya nusu fainali.

Mwingine aliyekosa medali ni Kocha wa makipa wa Mtibwa Sugar, Patrick Mwangata ambaye ndiye alipokea kitita cha Sh milioni 5.