HEMED MOROCCO ANUKIA MSIMBAZI, MAMBO YAKIWA SAFI, ATACHUKUA NAFASI YA KERR

Pamoja na kumpa mikoba Kocha Jackson Mayanja, Simba imeanza kumsaka kocha mkuu na taarifa zinaeleza mzalendo, Hemed Morocco anaweza kuwa bosi mpya Simba.

Simba inaonekana kutaka kocha mzalendo kwanza na inaonekana Morocco ana nafasi ya kuchukua mikoba ya Mwingereza, Dylan Kerr ambaye amefutwa kazi na Simba.

Wakati Kerr anaondoka, Mayanja tayari yuko Zanzibar na ameanza kazi lakini habari za ndani zinaeleza Simba imefanya mazungumza na Morocco ingawa jambo hilo linafanywa siri.

“Kweli kuna mazungumzo yamefanyika, lakini kila upande unaonekana kuficha sana na hakuna anayekubali hata kidogo kama mazungumzo hayo yamefanyika,” kilieleza chanzo.

“Tena inaonekana wako katika hatua za mwisho kabisa kwani Morocco pia anaonekana yuko tayari,” kiliongeza chanzo.

Morocco ambaye amewahi kuinoa Coastal Union, timu ya taifa ya Zanzibar na sasa ni kocha msaidizi wa Taifa Stars chini ya Charles Boniface Mkwasa.