SOMA HAPA UMSIKIE AJIBU KUHUSIANA NA ANAVYOTAKA KUFANYA

Kiungo anayekua kwa kasi wa Simba, Ibrahim Ajib, amesema yupo makini sana kwa sasa uwanjani na kila atakapopata nafasi ya kufunga atafunga mabao mengi tu kwa timu yake.

Ajib amesema, isionekane kama anabahatisha kuifungia Simba kila mara kwani huwa anazitafuta nafasi kwa nguvu na akili nyingi.

“Unajua ninachotaka ni kuisaidia Simba tu ifikishe malengo yake iwe katika ligi kuu (Bara) au sasa kwenye Kombe la Mapinduzi,” alisema Ajib. 

Ajib ambaye amekuwa hatajwi sana kikosini, ndiye anaonekana kuibeba Simba msimu huu na mwaka jana aliisaidia kwa kiasi kikubwa kutwaa ubingwa wa Kombe la Mapinduzi.

Alisema anahitaji kujituma kwa hali na mali kuweza kuisaidia timu yake na kudai kuwa hafanyi ajizi pindi atakapopewa nafasi na kocha wake Dylan Kerr.

“Siri ya mafanikio yangu ni kujitambua na kujituma kupita kiasi, siwezi kusema mimi ni muhimu zaidi kuliko wengine katika timu, hapana, bali huwa sifanyi ajizi pindi ninapopata nafasi,” alisema Ajib.