MSERBIA AENDELEA KUTAMBA, AMTAKA CHEKA AKODI GARI LA WAGONJWA

Bondia Gerard Ajetovic amesisitiza anataka mpinzani wake Francis Cheka akodi gari la wagonjwa.

Ajetovic, raia wa Serbia anayefanya kazi zake nchini Uingereza amesema anataka kumpiga Cheka kwa kuwa ni mzee ndiyo maana anasisitiza aende na gari la wagonjwa.

Cheka anapanda ulingoni kwenye Viwanja vya Leaders keshokutwa Jumamosi kumvaa Mserbia huyo aliyewahi kutoa kipigo kwa Cheka.

"Umri umeenda sana lakini kwangu namuona si lolote, ajiandae tu kupokea kipigo. Ndiyo maana nasisitiza afanye kila linalowezekana kukodi gari la wagonjwa," alisema Ajetovic.

Kabla ya hapo, Cheka alisafiri hadi nje ya Tanzania ambako aliweka kambi kujiandaa na pambano hilo linalosubiriwa kwa hamu.