MUDA MCHACHE BAADA YA SIMBA KUMFUNGIA ISIHAKA, KIIZA AMMWAGIA SIFA MTANDAONI, ASEMA ANACHAFULIWA

KIIZA, ISIHAKA, MWALYANZI NA AWADHI JUMA WAKISHANGILIA MOJA YA MABAO YA SIMBA

Sakata la beki Hassan Isihaka wa Simba limeanza kuchukua taswira mpya baada ya mshambuliaji nyota wa kikosi hicho, Mganda Hamisi Kiiza kusema anachafuliwa.

Kiiza ametupia maoni yake kwenye mtandao wa Instagram akieleza namna anavyovutiwa na Isihaka huku akisema ni bonge la nahodha.

Kiiza amekuwa mjanja, hakuweka wazi anayemlenga, lakini ni muda mchache tu baada ya uongozi wa Simba kutangaza kumfungia, naye akammwagia sifa hizo.

HIKI NDICHO ALICHOTUPIA ISIHAKA KATIKA AKAUNTI YAKE

Kama hiyo haitoshi, Kiiza ameonyesha kusisitiza kwamba si vema kuchafua jina la mtu, hii ikionyesha wazi kwamba anasema jina la Isihaka linachafuliwa.

Ingawa hajatoa maelezo katika hilo kuwa anachafuliwaje au nani, lakini Kiiza amesisitiza Isihaka ni mtu mwenye nidhamu ya juu kabisa na akamalizia kwa kusema anamuachia Mungu.

Maneno hayo, yanaonyesha kuzua mkanganyiko na uamuzi wa Simba kumsimamisha kwa muda usiojulikana kwa madai ya kutoa maneno ya shombo kwa kocha Jackson Mayanja.

Juhudi za kumpata Kiiza zilishindikana, lakini viongozi wa Simba hawakupokea simu zao. Tutawatafuta kesho ili kupata uhakika wa mambo haya.