PHIRI: HATUNA UOGA HATA KIDOGO, LAKINI TUKO MAKINI NA TUTAPAMBANA

BOBAN: MMOJA WA WACHEZAJI WAKONGWE WA MBEYA CITY

Kama ulidhani, Mbeya City wana uoga katika mechi yao dhidi ya Simaba, basi umejidanganya. Wako tayari kupambana leo Uwanja wa Taifa.

Kocha Mkuu wa Mbeya City, Kinnah Phri amesema wanataka kupambana na kushinda na hawana uwoga wowote.

Lakini Phiri raia wa Malawi akasisitiza kikosi chake kitakuwa makini kwa kuwa anajua wanakutana na timu kongwe ya Simba.

“Simba inaendelea kubaki timu ileile yenye heshima zake. Wana timu nzuri na tunalitambua hilo lakini hatuwezi kuhofia hata kidogo.

“Kikubwa tunakuwa makini kuhakikisha tunajilinda vizuri na kushambulia kutengeneza nafasi za mabao ambazo tutatakiwa kuzitumia,” alisema.

Mbeya City kweli si timu ya kubeza kwa kuwa ina wachezaji wazuri na wakongwe kama Haruna Moshi ‘Boban’, Ramadhani Chombo ‘Redondo’ na wengine ambao ni wazoefu wa ligi kuu.