Mwenyekiti wa Klabu ya Yanga, Yusuf Manji, juzi Jumatano kwa mara ya kwanza baada ya muda mrefu alitinga kwenye mazoezi ya timu hiyo na kuzungumza na wachezaji wote waliopanga kugoma kushinikiza kulipwa mishahara yao wanayodai kwa miezi mitatu.
Manji ambaye kwa muda mrefu amekuwa kimya kutokana na matatizo binafsi yanayomkabili, alilazimika kufanya hivyo ikiwa ni siku moja kabla ya kikosi hicho kusafiri kwenda Algeria kupambana na MC Alger katika mchezo wa marudiano wa Kombe la Shirikisho Afrika utakaopigwa kesho Jumamosi.
Mazoezi hayo ya mwisho yaliyofanyika Uwanja wa Taifa, Dar, yalichelewa kuanza kwa saa 1:15 kutokana na kuwepo kwa mgomo huo.
Kikao chao kilianza saa 10:00 jioni hadi saa 11:15 walipoanza mazoezi huku Mzambia, Obrey Chirwa na Wazimbabwe, Thabani Kamusoko na Donald Ngoma wakigoma kabisa kufanya mazoezi baada ya kufika wakiwa na mavazi yao ya nyumbani tofauti na wenzao waliovalia mavazi ya mazoezini.
Wakati wa kikao bosi mmoja wa benchi la ufundi alisikika akiwabembeleza wachezaji kuvumilia hali iliyopo klabuni kwao kwa sasa.
Bosi huyo aliwaambia Manji ameomba muda wa miezi miwili kuweka mambo yake sawa.
Wakiwa kwenye mazungumzo ya mwisho pamoja na kuomba dua kabla ya kuondoka uwanjani hapo, ghafla Manji akaingia akiwa na watu watatu na moja kwa moja akajumuika nao na kuanza kuongea kwa takribani dakika nane, kisha akaondoka.
Baada ya Manji kuondoka, katibu wa klabu hiyo, Charles Mkwasa, akaanza kuzungumza na wachezaji hao kwa nusu saa, baada ya hapo wakatawanyika huku wachezaji wakionekana kuwa na furaha tofauti na awali.
Taarifa ambazo zilipatikana baadaye baada ya wote kutawanyika, ni kuwa waliahidiwa kulipwa fedha zao kuanzia jana kitendo ambacho kiliwafanya baadhi ya wachezaji kumvaa Mkwasa na kuanza kumuuliza utaratibu wa kuzipata fedha hizo.
Mkwasa akawapa maelekezo yote ya namna ya kupata fedha zao.
Alipofuatwa Mkwasa kutaka kujua walichokuwa wakikijadili baada ya Manji kufika mazoezini na mambo mengine, lakini hakuwa tayari kutolea ufafanuzi.
SOURCE: CHAMPIONI
0 COMMENTS:
Post a Comment