KERR HANA TATIZO NA SIMBA KUMCHUKUA KAHATA, AWATAKA KUFUATA JAMBO HILI MOJA

Na George Mganga

Kocha Mkuu wa Gor Mahia FC, Dylan Kerr, amefunguka kuhusiana na kiungo wa timu yake, Francis Kahata, kuhusishwa kutimkia katika klabu yake ya zamani ya Simba.

Kerr ameeleza kuwa hana tatizo na mabosi wa Simba kumsajili mchezaji ikiwa ni takribani wiki moja na siku kadhaa zimepita tangu wamalizane na aliyekuwa straika wa kikosi cha Gor Mahia, Meddie Kagere.

Kiungo wa Gor Mahia FC, Francis Kahata

Kerr ameeleza kama Simba wanahitaji kumsajili Kahata hawapaswi kutumia njia za kinyemela na badala yake wanapaswa kufuata taratibu rasmi kwa kufanya mawasiliano na uongozi wa klabu waweze kufika nao mwafaka.

Kocha huyo aliyewahi kusakata kambumbu na klabu za Leeds United, Reading na zinginezo huko England amewataka Simba kufanya hivyo ili kuonesha ueledi kutokana na taratibu za usajili zinavyotaka.

"Kama Simba wanamtaka Kahata wanapaswa kuzungumza na mabosi wangu, si kumnyemelea kwasababu haileti maana nzuri, ni kiungo mzuri katika kikosi chetu na bado ana mkataba na klabu, kama wamefurahishwa naye, vema wakafanya mazungumzo na viongozi ili waweze kumalizana" amesema Kerr.

Kocha Kerr yupo hapa nchini jijini Dar es Salaam na timu ya Gor Mahia kwa ajili ya mashindano ya CECAFA KAGAME CUP yanayoendelea hivi sasa ambapo leo majira ya saa 12 jioni, watakuwa wanashuka dimbani kucheza dhidi ya AS Ports ya Djibout.