KOCHA NDANDA AUTAJA MFUMO UTAKAOCHUKUA POINTI TATU ZA SIMBA MTWARA

Na George Mganga

Kocha wa timu ya Ndanda, Malale Hamsini, ameahidi kufuta uteja dhidi ya Simba watakapokutana kwenye mchezo wa Ligi Kuu Bara, Jumamosi ya wiki hii.

Simba watakuwa wageni wa Ndanda kwenye Uwanja wa Nangwanda Sijaona mjini humo kwa ajili ya kipute chao cha tatu cha ligi.

Hamsini ambaye ameahidi kufuta uteja, ameibuka na kuweka hadharani mfumo ambao atautumia ili kuwamaliza Simba kwenye mechi hiyo inayosubiriwa kwa hamu na wadau wa soka mkoani humo.

Kocha huyo ambaye kikosi chake kilinusurika kushuka daraja msimu uliopita, amesema atakuja na mfumo wa 4-2-3-1 anaouamini utaweza kuwamaliza haraka Simba.

Tangu Ndanda ipande daraja mwaka 2014 haijawahi kuifunga Simba katika mchezo wowote ule ambapo Hamsini ameeleza kutumia mapungufu ya Simba kwa ajili ya kuwamaliza mapema.