MCHENGA BBALL NI NOMA SANA, WAENDELEZA MAKALI YAO NDANI YA SPRITE BBALL KINGS

MCHENGA Bball ambao ni mabingwa watetezi wa kombe la Sprite Bball Kings wameanza kuwasha moto baada ya mchezo wao wa kwanza hatua ya 16 bora uliochezwa jana kushinda kwa kishindo mbele ya wapinzani wao Temeke Heroes.

Mchezo huo wa kikapu uliochezwa jana kwenye viwanja vya Don Bosco Oysterbay ulikuwa na ushindani mkubwa ulishuhudiwa na mashabiki wengi ambapo Mchenga walishinda kwa vikapu 114 dhidi ya vikapu 94 kwa wapinzani wao Temeke Heroes

Pia kwenye mchezo wa pili uliokuwa kati ya Dream Chaser dhidi ya Yo! Street, Dream Chasers iliibuka na ushindi wa vikapu 109 dhidi ya 90 vya Yo! Streets.

Katika mchezo wa tatu, Tamaduni iliibuka na ushindi wa vikapu 87 dhidi ya vikapu 76 vya Nothing But Nets, huku mchezo wa nne ukimalizika kwa Water Institute kuibuka na vikapu 76 dhidi ya vikapu 70 vya Stylers.

Hivyo timu ambazo zimetinga hatua ya robo fainali ni pamoja na Mchenga Bball, Dream Chaser, Tamaduni na Water Institute ambao wanawasubiri washindi wa leo ambao watakamilisha michezo yao ya hatua ya 16 bora ambao ni JK Ballers ballers watacheza na Ukonga Hitmen, KG Dallas dhidi ya Wagalatia, Weusi Basketball Club dhidi ta TMT na mechi ya mwisho ni kati ya Flying Dribblers na Oysterbay.