MKWASA AIBUKIA BENCHI LA UFUNDI YANGA, AMFUNGUKIA FALCAO

Baada ya kulazimishwa sare ya 1-1 katika mchezo wa hatua ya kwanza ya Ligi ya Mabingwa Afrika dhidi ya Zesco United uliofanyika Uwanja wa Taifa, Dar es Salaam, aliyewahi kuwa Katibu Mkuu wa Yanga, Boniface Mkwasa, amelitaka benchi la ufundi kufanyia kazi mapungufu yaliyo kwenye safu ya ushambuliaji kabla ya mchezo wa marudiano.

Yanga itakuwa na kibarua kizito dhidi ya miamba hao wa Zambia kwenye dimba la  Levy Mwanawasa, Septemba 27, ambao kwa mujibu wa Kocha wao mkuu, George Lwandamina, alisema hawajawahi kupoteza kwenye uwanja wao wa nyumbani.

Mkwasa ameeleza Yanga imekuwa na tatizo kubwa la umaliziaji sababu ya kukosekana kwa muunganiko mzuri kama ilivyoonekana kwenye mechi ya Jumamosi iliyopita.

Amesema ili kutatua tatizo hilo inabidi Kocha Mwinyi Zahera alifanyie kazi kwa uharaka ndani ya kipindi hiki ambacho wana muda wa kujiandaa kabla ya siku ambayo mechi itachezwa.

"Unajua Yanga mpaka sasa wana tatizo katika safu ya ushambuliaji, nadhani labda inachangiwa na ugeni wa wachezaji ambao naamini bado hawajazoeana.

"Katika mechi dhidi ya Zesco kulikuna na changamoto nyingi ya wachezaji kukosa mawasiliano mazuri, inabidi Mwalimu aliangalie vema kwa jicho la tatu ili kulirekebisha mapema.

"Naimani wanaweza kufanya vema endapo watajipanga vizuri maana Zesco ni wazuri zaidi haswa wakiwa kwenye uwanja wao wa nyumbani, lakini kama wakichukulia poa itawagharimu na mwisho wa siku watafanya vibaya," alisema Mkwasa ambaye alijuzulu ukatibu mkuu kutokana na hali yake kiafya kuwa si rafiki.

Mbali na ushauri kwa benchi la ufundi, Mkwasa amemzunguzia mshambuliaji mpya wa Yanga, Mkongomani, David Molinga 'Falcao' kuwa ukubwa wa umbo lake si sababu ya yeye kufanya vibaya badala yake utasaidia.

"Ukubwa wa umbo la Molinga si sababu ya yeye kufanya vibaya, tunaona hata wachezaji wengi ulaya wana maumbo makubwa ambayo yanasaidia katika kuilinda mipira isipotee, pia stamina ya mwili.

"Mchezaji anaweza kuwa na mwili mkubwa lakini akakosa spidi na badala yake akawa anaweza kumiliki mpira vizuri pamoja na kumuongezea morali ya kukabiliana na wapinzani wake."