‘KANE ONDOKA SPURS, NENDA MAN U’

KOCHA mkongwe kwenye soka la England, Harry Redknapp amemwambia mshambuliaji Harry Kane kuwa, huu ndiyo muda sahihi kwake kwenda Manchester United.

Kocha huyo mwenye uwezo wa hali ya juu, amesema kuwa hiki ndicho kipindi ambacho mchezaji huyo anaweza kufiti kwenye timu hiyo kwa kuwa haina mshambuliaji sahihi.

Hata hivyo, kocha huyo wa zamani wa Spurs, amesema ni vyema mchezaji huyo akatulia hadi atakapopata ofa kubwa ambayo inaweza kunyanyua maisha yake kisoka.

Hata hivyo, taarifa zinasema kuwa, Tottenham wanataka kitita cha pauni milioni 200 kwa ajili ya kumuachia mchezaji huyo raia wa England.

Kane amekuwa akisema kuwa anataka kuondoka kwenye timu hiyo kama ataona kuwa hapati mafanikio makubwa sana kwenye timu hiyo.

“Kwa sasa anaonekana kuwa anaweza kufiti kwenye kikosi cha Man United, anaweza pia kuwa fiti kwenye timu yoyote ile, lakini kwa sasa Man United ni bora kuliko Spurs.

“Nafikiri kuwa anatakiwa kuangalia wapi kwa sasa anaweza kwenda kwa kuwa ndiyo muda sahihi kwake, lakini ni lazima awe makini na ofa yake atakayopata,” alisema kocha huyo ambaye ndiye aliyemtoa timu ya vijana ya Spurs mwaka 2009 na kumpa nafasi timu ya wakubwa.

Mshambuliaji huyo kwa msimu huu amefunga mabao 17, akiwa ametoa pasi mbili za mabao kwenye michezo 25.