BAADA YA KUPOKEA KICHAPO, KOCHA ABWAGA MANYANGA

 

KOCHA Mkuu wa Mbao, Salmin Kamau, ameachia ngazi huku akidai timu yake inapitia katika mazingira magumu na uongozi usipochukua hatua za haraka lolote linaweza kutokea.

Kocha huyo alitoa rai hiyo mara baada ya kumalizika kwa 'dabi' ya Mwanza na timu yake kukubali kipigo cha mabao 3-0 kutoka kwa Pamba, katika mchezo uliopigwa Dimba la CCM Kirumba Oktoba 24.

 

Dalili za Pamba kushinda mchezo zilianza mapema kwani dakika ya sita ya mchezo ilitosha kuwapatia bao la kuongoza kupitia kwa Shaaban Imamu, kabla ya kurudi tena nyavuni na kuwapatia bao la pili dakika 40 ya mchezo na bao la tatu likihitimishwa na Ajib Mohamed dakika ya 76.

 

Kamau alisema kwanza anawapongeza wachezaji wake wamepambana vya kutosha kwani timu yake walikutana saa 8 mchana masaa mawili kabla ya mchezo, akiwa hafahamu kama mchezaji kaja ana tatizo gani, je amekula na kushiba, sasa kwa mazingira hayo ndiyo maana anasema wamejitahidi sana.

 

"Kikuweli Mbao tuna mazingira magumu sana na mimi kama kocha nashindwa kutekeleza majukumu kwa wachezaji wangu kwani mazingira ninayoyaona timu haina kambi, mchezaji anatoka kwao saa 1 kabla ya mchezo umempimaje kujua kama yupo fiti kwa ajili ya mchezo husika na haya ndo matokeo tunayopata, kama hatutakuwa makini lolote linaweza kutokea, " alisema kocha huyo.

 

Hata hivyo, baadaye taarifa zilitokea kuwa kocha huyo ameamua kuachia ngazi ambapo alipoulizwa alisema: “Ni kweli nimekaa na kutafakari na sasa nimeamua kujiuzulu nafasi yangu ya ukocha katika timu ya Mbao na sababu kubwa ni kutokana na timu yetu kukabiliwa na ukata kiasi kwamba timu inashindwa kujihudumia yenyewe.”