TUJITOKEZE KESHO KWA WINGI KUIPA SAPOTI TIMU YA TAIFA YA TANZANIA

KESHO Jumapili, timu yetu ya Taifa ya Tanzania, Taifa Stars, itakuwa na mchezo wa kirafiki wa kimataifa dhidi ya Burundi kwenye Uwanja wa Mkapa jijini Dar es Salaam.

 

Mchezo huo ni sehemu ya kukiandaa kikosi kuelekea michezo ijayo ya kimashindano ikiwemo kufuzu Afcon na Kombe la Dunia 2022.

 

Tunapocheza mechi za kirafiki ni sehemu ya kukiandaa kikosi kuwa imara na cha ushindani hivyo hizi mechi zina umuhimu wake mkubwa.

 

Taifa Stars ambayo kwenye viwango vya soka kwa mujibu wa Shirikisho la Soka la Kimataifa (FIFA) hatupo sehemu nzuri, tunapaswa kuendelea kufanya vizuri ili kupanda viwango.

 

Kufanya huko vizuri kunategemewa na sapoti ya Watanzania wote, hivyo hatuna budi kesho kwenda kwa Mkapa kuwapa sapoti vijana wetu.

 

Tumeona benchi la ufundi chini ya kocha mkuu, Etienne Ndayiragije likiita kikosi ambacho hakuna aliyekuwa na maswali mengi.

 

Kikosi kimezingatia viwango husika vya wachezaji kutokana na kile walichokifanya ndani ya muda huu.

 

Kikubwa ambacho kinazidi kukipa nguvu kikosi hiki ni uwepo wa nyota wa kimataifa walioitwa ambao wote wamefika kwa wakati kasoro kiungo, Himid Mao ambaye alikuwa na majukumu katika klabu yake ya ENPPI ya Misri.

 

Kabla ya mchezo huu, niliwahi kusikia watu wakizungumza tofauti juu ya timu tunayokwenda kucheza nayo kwamba inaweza isiwe kipimo sahihi kwetu. Mimi napingana nao.

 

Napingana nao kwa sababu licha ya kwamba Burundi tumewapita kwenye viwango vya soka duniani, lakini ukiangalia vikosi pengine wao wametuzidi kwa wachezaji wanaocheza nje ya nchi yao.

 

Kikosi chao ukiangalia kina nyota watatu wanaocheza soka hapa Tanzania ambao ni Jonathan Nahimana, Blaise Bigirimana na Steve Nzigamasabo wanaokipiga Namungo.

 

Nahodha wao ni Saido Berahino anayecheza Zulte Waregem ya Ubelgiji.

 

Wengine ni Cedric Amissi (Al-Taawoun, Saudi Arabia), Mohamed Amissi (Heracles Almelo, Ubelgiji), Philip Nzeyimana Oslev (Akademisk Boldklub Gladsaxe, Denmark), Frederick Nsabiyumva (Chippa United, Afrika Kusini), Bonfils Caleb Bimenyimana (Pohronie, Slovakia), Yussuf Nyange Ndayishimiye (Yeni Malatyaspor, Uturuki) na Abdoul Razzak Fiston wa ENPPI ya Misri.

 

Hao ni wachezaji 11, huku kwetu tunao sita ambao ni Himid Mao (ENPPI SC, Misri), Ally Msengi (Stellenbosch FC, Afrika Kusini), Mbwana Samatta (Fenerbhace FC, Uturuki), Thomas Ulimwengu (TP Mazembe DR Congo), Nickson Kibabage na Simon Msuva wanaocheza Diffa El Jadidi, Morocco).

 

Ukiangalia vizuri utagundua kwamba Burundi itakuwa kipimo sahihi kwetu kutokana na sababu hizo nilizozieleza.

 

Hivyo basi twendeni uwanjani kuwapa sapoti vijana, ule ushabiki wetu wa klabu tuuweke pembeni kisha tuungane kwa pamoja kuishangilia Taifa Stars.

 

Siku zote kwenye soka shabiki ni mchezaji wa 12, hivyo uwepo wake kunaleta nguvu zaidi kwa wachezaji waliopo ndani ya uwanja wanaoipeperusha bendera ya nchi yetu.

 

Kufanya vizuri kwa Taifa Stars kunahitaji nguvu zetu kwa hamasa ya kuwashangilia ili watupe tunachokitaka.

 

Tukiwasusia wanaweza kushindwa kufikia malengo na hapo hakutakuwa wa kumlaumu.

 

Tuiunge mkono Taifa Stars, tunapoenda uwanjani tuvae jezi na kuupendezesha uwanja kwa rangi za taifa letu.

 

Hiyo itawafanya wapinzani waone Watanzania tumeamua na tunaipenda timu yetu. Hivyo tuhamasishane kwenda kuwasapoti vijana wetu.