MBEYA CITY V IHEFU WAPIGANA MIKWARA

 

LIGI Kuu Tanzania Bara inatarajia kuendelea kutimua vumbi jioni ya leo kwenye Uwanja wa Kumbukumbu ya Sokoine jijini Mbeya.

 

Tangu Ihefu ipande leo hii ndiyo inaingia kwenye dabi kati yake na Mbeya City kabla ya kuwavaa Prisons mchezo unaofuata.

 

Akizungumzia maandalizi kuelekea mchezo huo Kocha Mkuu wa Ihefu, Zubeir Katwila, amesema wamejiandaa vizuri kuhakikisha wanapata pointi tatu kwenye mchezo huo.

 

"Tumejiandaa vizuri kuwakabili ndugu zetu na tunaimani tutapata matokeo chanya na kuondoka kwenye nafasi ya mwisho katika msimamo," amesema.

 

Ihefu inaingia uwanjani ikiwa na kumbukumbu ya kulazimisha sare ya bila kufungana na Namungo FC kwenye mchezo wao wa ligi uliochezwa Uwanja wa Sokoine

Kwa upande wake kocha msaidizi wa Mbeya City, Mathias Wandiba yeye ametamba kuendeleza wimbi la ushindi kwenye mchezo huo.

 

"Maandalizi yamekamilika na wachezaji wako kwenye hali nzuri na morali iko juu kuelekea mchezo huo ambao utakuwa mgumu lakini imani yetu nikuwa tutashinda," amesema .

Mbeya City inaingia uwanjani ikiwa na kumbukumbu ya kushinda mabao 2-1 dhidi ya Kagera Sugar, Uwanja wa Kaitaba.