VIGONGO VITANO VIKALI KWA YANGA HIVI HAPA

 

CEDRIC Kaze, Kocha Mkuu wa Yanga ana dakika 450 za moto kusaka pointi tatu muhimu ndani ya mwezi Desemba kwa kucheza mechi tano kali kabla ya kuufunga mwaka 2020.

 

Kete ya kwanza kwa Yanga itakuwa dhidi ya Ruvu Shooting, Uwanja wa Mkapa Desemba 6. Kaze atakutana na Charles Mkwasa ambaye anazijua mbinu za timu hiyo kwa kuwa kabla ya kuibukia ndani ya Ruvu alikuwa kocha msaidizi.

 

Desemba 12,Yanga itawafuata Mwadui FC ambao wamekuwa na matokeo ya kusuasua ikiwa nafasi ya 17 na pointi 10 baada ya kucheza mechi 13, Uwanja wa Kambarage

 

Yanga itarejea Dar kumenyana na Dodoma, Desemba 19, Uwanja wa Mkapa itakuwa ni mara ya kwanza kukutana ndani ya uwanja kwa kuwa timu hii imepanda daraja msimu huu.

 

Kaze atakiongoza kikosi chake mbele ya Ihefu inayonolewa na Zuber Katwila, Desemba 26, Uwanja wa Sokoine, Mbeya.

 

Funga kazi kwa 2020 itakuwa ugenini dhidi ya Tanzania Prisons ambayo iliwapa tabu watani zao wa jadi Simba kwa kuwafunga bao 1-0 Uwanja wa Nelson Mandela itakuwa  Desemba 31.