MTAMBO WA MABAO NDANI YA YANGA MAMBO BADO

 

MAJERAHA ya nyama za paja aliyoyapata kiungo mshambuliaji nyota wa Klabu ya Yanga, Yacouba Sogne yameendelea kukiweka kikosi hicho katika hofu kubwa ya kumkosa nyota huyo kwa muda mrefu.

Yacouba aliyehusika kwenye mabao nane ya Yanga akifunga mabao manne na kuasisti mara nne alipata majeraha hayo kwenye mchezo wa nusu fainali ya kombe la Mapinduzi dhidi ya Azam na kumfanya akosekana kwenye mchezo wa fainali dhidi ya Simba uliopigwa siku ya Jumatano, Januari 13.

Kwenye fainali hiyo Yanga waliibuka mabingwa baada ya kuifunga Simba kwa mikwaju ya Penalti 4-3 walitwaa taji hilo kwa mara ya pili tangu kuanzishwa kwa kombe hilo rasmi mwaka 2007.

Akizungumzia hali ya Yacouba, Meneja wa kikosi cha Yanga Hafidh Saleh amesema nyota huyo bado anasumbuliwa na maumivu ya nyama za paja na anatarajiwa kufanyiwa vipimo tena ili kujiridhisha juu ya hali yake.

“Yacouba bado anasumbuliwa na majeraha ya nyama za paja, hapo mwanzo tulitarajia angekuwa sehemu ya mchezo wa fainali dhidi ya Simba siku ya Jumatano lakini kwa bahati mbaya haikuwa hivyo.

“Hii ni baada ya madaktari kuamuru aendelee kupata mapumziko na atafanyiwa tena vipimo ili kujiridhisha juu ya maendeleo yake,”

Kuhusu safari ya kurejea kwao jijini Dar es Salaam Saleh alisema: “Kikosi chetu kipo safarini kurejea jijini Dar es Salaam leo Ijumaa ambapo taratibu nyingine za mapumziko zitafuata, kabla ya kurejea kambini,”.