STRAIKA AZAM ATANGAZA HALI YA HATARI

 

BAADA ya kutupia bao moja akiwa na jezi ya klabu  ya Azam katika michuano ya kombe la Mapinduzi, straika mpya wa klabu hiyo raia wa DR Congo, Mpiana Monzinzi amefunguka kuwa atafunga sana ndani ya kikosi hicho.

Monzinzi alikamilisha rasmi usajili wake ndani ya Azam Desemba 23, mwaka jana akisaini mkataba wa mwaka mmoja kutokea kikosi cha FC Lupopo, amekuja kuchukua nafasi ya Mcameroon Alain Thierry Akono Akono aliyeuzwa nchini Malaysia.

Akizungumzia matarajio yake ndani ya kikosi cha Azam, Monzizi amesema: “Nashukuru kwa kuanza vizuri nikiwa na kikosi cha Azam, ambapo nimefunga bao kwenye mchezo wangu wa awali ambalo limeongeza ari yangu.

“Nimekuja hapa kusaka changamoto mpya nikijua wazi kwamba soka la Tanzania lina ushindani mkubwa, na nimejiandaa kufanya makubwa kwa kufunga mabao mengi ili kuisaidia timu yangu,” alisema Monzinzi.