ENGLAND YAIFUMUA SAN MARINO 8-0, HISPANIA YABANWA

England imeonyesha imepania kupita na kucheza Kombe la Dunia nchini Brazil mwakani baada ya kuichapa San Marino kwa mabao 8-0.

England imeibuka na ushindi huo mkubwa ikiwa ugenini na wenyeji walionyesha tokea dakika za mwanzo wasingeweza kuuhimili muziki wa England.

England ilipata mabao yake kupitia Alessandro Della Valle ambaye alijifunga wakati anajaribu kuokoa katika dakika ya 12. Kinda Oxlade-Chamberlain anayekipiga Arsenal akaongeza bao katika dakika ya 28.

Wakati wenyeji wakijiuliza, mshambuliaji mwenye kasi wa Spurs, Defoe akapiga bao katika dakika ya 36 kabla ya Ashley Young wa Man United kufunga tena katika dakika ya 39.

Ilionekana kama England itaenda mapumziko ikiwa na mabao hayo, lakini mkongwe Frank Lampard akaendelea kuthibitisha kuwa bado wamo baada ya kufunga bao katika dakika ya 42.

Kipindi cha pili kilianza kwa England kushambulia mfululizo na Wayne Rooney maarufu kama Wazza akafunga bao lake katika mechi hiyo katika dakika ya 54, Sturridge akaongeza katika dakika ya 70 kabla ya Defoe kupigilia msumari wa mwisho dakika ya 77.

Upande mwingine, mabingwa Hispania, wakiwa nyumbani walijikuta wakiwa katika wakati mgumu baada ya kushikiliwa na kulazimishwa sare ya bao 1-1 na wageni wake Finland.