NIZAR, MWASYIKA WAREJEA, WAANZA MAZOEZI MDOGO MDOGO

Kiungo wa pembeni wa Yanga, Nizar Khalfan ameanza mazoezi ya taratibu ikiwa ni siku chache tokea alipoumia.

Nizar aliumia wakati Yanga ilipokuwa ikipambana na Ruvu Shooting katika mechi ya Ligi Kuu Bara, mechi ambayo aliibuka shujaa kwa kufunga bao pekee lililoipa Yanga pointi tatu muhimu.

Katika mechi hiyo, Nizar aligongana na mchezaji mmoja wa Ruvu Shooting, hali iliyolazimisha atolewe kwa ajili ya kupatiwa matibabu zaidi.

Daktari wa Yanga, Nassor Matuzya amethibitisha Nizar kuanza mazoezi peke yake na keshokutwa Jumatatu anatarajia kuungana na wachezaji wengine wa Yanga.

Nizar ni kati ya wachezaji wazoefu walio katika kikosi cha Yanga na kadri siku zinavyosonga mbele, Kocha Ernie Brandts amekuwa akizidisha imani kwake na kumpa nafasi tofauti na ilivyokuwa awali.

Mchezaji mwingine ambaye alikuwa ameanza mazoezi baada ya kukaa siku kadhaa nje kutokana na kuumia ni beki Stephano Mwasyika.

Matuzya amesema Mwasyika alishaanza mazoezi na Jumatatu atajumuika na wenzake kuendelea na mazoezi ya kujiimarisha zaidi ili kurejea kikosini.