JK AKABIDHIWA JEZI YA MWAIPOPO

Rais wa Jamhuri ya Muungano wa Tanzania, Jakaya Mrisho Kikwete, jana alitembelea na kuuzindua Uwanja wa Chamazi Complex unaomilikiwa na Azam FC.

Katika ziara hiyo, Kikwete maarufu kama JK alikabidhiwa jezi ya Azam FC ambayo timu huitumia ugenini na mchezaji aliyepata bahati Rais Kikwete kutumia jezi yake ni Ibrahim Mwaipopo.

Kikwete alikabidiwa jezi namba 4 ambayo hutumiwa na kiungo huyo mkabaji wa Azam FC, haikujulikana mara moja kwa nini rais alipewa jezi yenye namba hiyo.

Lakini pia haikujulikana kwa nini Rais Kikwete alikabidiwa jezi ya ugenini inayotawaliwa na rangi ya njano badala ya ile ya nyumbani inayotawaliwa na rangi nyeupe?

Akiwa eneo hilo, Kikwete alitembelea maeneo mbalimbali ya uwanja huo na wakati wa hotuba yake aliwapongeza Azam FC kutokana na hatua kubwa waliyopiga huku akiwataka Simba na Yanga au timu nyingine za wanachama kuiga mfano.

Pia aliwataka kubadilika na kuacha maneno mengi au kutegemea klabu ziwasaidie wao badala ya wao kuzisaidia.