KISA NDEGE, MALKIA WA NYUKI ASHINDWA KUUNGANA NA SIMBA BUKOBA

Wakati wachezaji wa Simba waliokuwa katika kikosi cha Taifa Stars wamekwama jijini Mwanza wakiwa njiani kwenda mjini Bukoba, Mlezi wao, Malkia wa Nyuki hatakwenda kabisa.

Rahma Al Kharusi, maarufu kama Malkia wa Nyuki ameshindwa kwenda Bukoba kuungana na wachezaji wa Simba kutokana na kukwama kupata tiketi ya ndege ya kurudi jijini Dar.

Akizungumza na Salehjembe alisema amefanikiwa kupata tiketi ya kwenda pekee, wakati tiketi ya kurudi imekuwa tatizo.

“Nimefanya kila juhudi lakini imeshindikana kupata tiketi ya kurudi, nahofia nisije nikakwama Bukoba wakati nina mikutano muhimu Dar na Zanzibar.

“Hivyo naweza nisiende Bukoba kwa asilimia tisini, ila naendelea kujaribu kupata tiketi hiyo,” alisema Malkia.

Wakati mwanamama huyo nguzo katika kusaka ushindi kwa Simba anakwama kwenda, wachezaji Juma Kaseja, Nassor Said ‘Chollo’, Shomari Kapombe, Amri Kiemba na Mrisho Ngassa wako jijini Mwanza baada ya ndege kushindwa kutua Bukoba jana.

Ndege zimeshindwa kutua kwenye uwanja wa mji huo kutokana na mvua kubwa zilizokuwa zinaendelea kunyesha.

Kesho Jumatano, Simba ina kazi ngumu dhidi ya Kagera Sugar, mechi ya Ligi Kuu Bara ambayo ni muhimu kwa timu zote.