MAKALLA MGENI RASMI FAINALI NSSF

Naibu Waziri wa Habari, Vijana, Utamaduni na Michezo, Amos Makalla anatarajiwa kuwa mgeni rasmi katika mechi za fainali ya mashindano ya 10 ya Kombe la Shirika la Taifa la Hifadhi ya Jamii (NSSF).

Mratibu wa mashindano hayo, Juma Kintu alisema jana kuwa, fainali hizo za soka na netiboli, zitachezwa kesho kwenye uwanja wa klabu ya Sigara, Chang'ombe, Dar es Salaam.

Kintu alisema katika mechi hizo za fainali, Changamoto itamenyana na Jambo Leo wakati katika netiboli, TBC itamenyana na BTL.

Changamoto ilifuzu kucheza hatua hiyo juzi baada ya kuichapa IPP kwa penalti 4-3 wakati Jambo Leo iliitoa TBC kwa kuichapa mabao 2-0.

Katika netiboli, BTL ilifuzu kucheza fainali baada ya kuichapa Tumaini mabao 51-9 wakati TBC iliwalaza wenyeji NSSF kwa mabao 28-17.

Kintu alisema maandalizi yote muhimu kwa ajili ya mechi hizo za fainali yamekamilika na amewataka wafanyakazi wa vyombo vya habari vilivyoshiriki katika mashindano hayo kujitokeza kwa wingi kwenye sherehe za ufungaji.

Bingwa wa michuano hiyo kwa upande wa soka atazawadiwa kitita cha sh. milioni nne, mshindi wa pili sh. milioni tatu wakati mshindi wa tatu atapata sh. milioni 1.5.

Kwa upande wa netiboli, bingwa atazawadiwa sh. milioni tatu, mshindi wa pili atapata sh.milioni mbili na wa tatu sh. milioni moja.

Wafungaji bora wa michezo yote miwili watapata zawadi ya sh. 300,000 kila mmoja.

Mashindano hayo yalifunguliwa rasmi Machi 9 mwaka huu na Waziri wa Kazi na Ajira, Gaudencia Kabaka. Timu 17 kutoka vyombo mbalimbali vya habari zilishiriki katika mashindano hayo.

Timu hizo ni Habari Zanzibar, Changamoto, Free Media, TSN, Redio Kheri, IPP, BTL, Uhuru Media, Mlimani TV, Tumaini, Global, Jambo Leo, TBC, New Habari, Mwananchi, Sahara na wenyeji NSSF.