MALKIA WA NYUKI AGOMA DAR KUONDOKA BILA YA KASEJA, NGASSA

Mlezi wa Simba, Rahma Al Kharusi amesema hataondoka jijini Dar es Salaam kwenda Bukoba kuungana na wachezaji wengine wa Simba walio mjini humo kusubiri mechi dhidi ya Kagera Sugar hadi atakapoondoka na wachezaji walio katika timu ya taifa, Taifa Stars.

Manahoda wote wa Simba, Juma Kaseja na msaidizi wake, Shomari Kapombe wako katika kikosi cha Taifa Stars. Wengine ni Nassor Said ‘Chollo’, Mwinyi Kazimoto, Amri Kiemba na Mrisho Ngassa. Stars inajiandaa kuwavaa Morocco Jumapili.

Rahma maarufu kama Malkia wa nyuki amesema atawasubiri wachezaji hao ili aondoke nao kwenda Bukoba kwa ajili ya ‘vita’ hiyo dhidi ya Kagera Sugar.

“Vijana wengine wametangulia na kwenda kujiandaa na mchezo huo, lakini hawa wanabaki kwa ajili ya majukumu ya kitaifa. Nitawasubiri ili niondoke nao pamoja.

“Nafikiri nitakachofanya ni kuondoka nao pamoja kwa ndege hadi Kagera, tukiwa huko tutaongeza nguvu na kupambana pamoja,” alisema.

Malkia wa nyuki ndiye amekuwa muhimili mkubwa wa Simba ambayo imekuwa ikiyumba hasa kutokana na uongozi wake kutokuwa makini.

Simba inalazimika kuishinda Kagera Sugar nyumbani wiki ijayo ili kujiwekea uai wa kuendelea kuwania nafasi ya pili kwa kuwa ubingwa unaonekana kama vile tayari una mwenyewe, Yanga.