MAZOEZI YANGA NI NGINGANGINGA, HAKUNA UTANI HATA KIDOGO

Mazoezi ya vinara wa Ligi Kuu Bara, Yanga hayana tofauti na mechi au zaidi. Wachezaji wanatiana ‘njaa’ vilivyo na kila mmoja anaonekana amepania mazoezi kweli.

Katika mazoezi hayo leo kwenye Uwanja wa Bora Kijitonyama, Dar. Wachezaji wa Yanga walikuwa wakicheza kwa ushindani mkubwa.

Hali hiyo ilisababisha baadhi yao kuumia karibu kila baada ya dakika 15 kutokana na namna wanavyocheza kazikazi.

Kocha Mkuu, Ernie Brandts alisema anafurahishwa na namna mazoezi yanavyoendelea na ndiyo maana anawapa wachezaji muda mwingine wa kucheza mpira.

Lakini anafurahishwa zaidi kwa kuwa wachezaji wote wanaonekana wanafanya mazoezi siriaz, kitu kinachompa picha ni kweli wamepanga kumaliza ligi wakiwa mabingwa.

Hata hivyo, alisisitiza bado wana tatizo la kupoteza nafasi ambalo anaendelea kulifanyia kazi pamoja na wachezaji wake.

“Mwisho tutapata jibu, lakini lazima tufanye mazoezi tena na tena ili kuweka mambo safi,” alisema Brandts.

Ushindani wa mazoezi hayo ya Yanga, umesababisha watu wengi wawe wanajitokeza zaidi kwa kuwa yana burudani ya kutosha na wachezaji wanakuwa bize kama wako katika mechi.