BOBAN, MCHEZAJI ANAYEULIZIWA ZAIDI LIGI KUU

Kiungo mshambuliaji wa Simba, Haruna Moshi ‘Boban’, ndiye mchezaji anayeuliziwa zaidi kuhusiana na msimu ujao wa Ligi Kuu Bara.

Wadau wengi wa soka wamekuwa wakitumia email kwa Salehjembe wakitaka kujua Boban itakuwaje msimu ujao.

Baadhi yao wamekuwa wakipiga simu kutaka kujua kama Boban ataichezea Simba atajiunga na timu nyingine ya Ligi Kuu Bara.

Kumekuwa na taarifa kuwa, viongozi wa Simba wamekuwa wakijadili na kutofautiana kuhusiana na suala la kumbakisha waendelee nae au kumuacha aende.

Boban aliingia katika mgogoro na uongozi wa Ismail Aden Rage na kusimamishwa, hata hivyo, viongozi wa Simba walimama mara ya kwanza na kusema Boban na wenzake, Juma Nyosso, Ramadhani Chombo ‘Redondo’ hawakuwa wamesimamishwa.

Hata hivyo, baadaye vyombo vya habari vilifanikiwa kuthibitisha kwamba walikuwa wamesimamishwa kwa madai ya utovu wa nidhamu ambayo hayakuwekwa wazi.