MWASYIKA ATIMKIA ZAKE RUVU SHOOTING

Beki wa Yanga, Stephano Mwasyika amejiunga na Ruvu Shooting  tayari kwa kuichezea timu hiyo ya jeshi.

Chanzo kutoka kwa rafiki wa karibu na beki huyo kilisema Mwasika alijiunga na Ruvu baada ya kuona klabu yake ya Yanga haieleweki juu ya mustakabali wake wa kumsajili.

“Mwasyika baada ya kuona Yanga wapo kimya ameamua kujiunga na Ruvu na jana (juzi) aliichezea na kuonyesha kiwango cha juu sana,” alisema rafiki huyo ambaye hakutaka kutajwa jina.

Ofisa Habari wa Ruvu, Masau Bwire ambaye alikiri mchezaji huyo kujiunga nao lakini bado hajapewa mkataba kwa kuwa bado yupo kwenye majaribio.

“Mwasyika tupo naye lakini bado hatujampa mkataba amekuja kujaribu bahati yake na tunamuangalia kwa umakini kwanza kabla ya kuchukua maamuzi ya kumsajili moja kwa moja, nafikiri unajua sasa hivi tunahitaji mabeki wawili,” alisema Masau na kuongeza:

“Kesho ijumaa michuano yetu ya majeshi itaendelea kwa Ruvu kucheza na JKT Mlale na JKT Oljorio itavaana na JKU.”