KASI YA MRUNDI YAMSHTUA KIBADENI

SIKU TAMBWE ALIPOTUA SIMBA...

Achana na bao lake alilofunga siku ya kwanza tu akiwa anaichezea Simba, lakini kasi ya Amis Tambwe imemshtua kocha Abdallah Kibadeni.

Kibadeni maarufu kama Mputa, amesema kasi ya mshambuliaji huyo raia wa Burundi imemshtua na kumfurahisha.

“Ilikuwa ni siku ya kwanza, achana na kwamba alifunga bao, lakini kasi yake uwanjani ilikuwa nzuri sana.

“Sikutegemea yeye na mwenzake (Demunga) wangecheza hivyo. Maana walisafiri kutoka Dar es Salaam hadi Shinyanga, walipanda ndege na baadaye gari.

“Walifika hapa Shinyanga saa nane mchana na wakakubali kucheza. Wote wawili walicheza vizuri na uwezo ulikuwa mkubwa,” alisema Kibadeni.

Kocha huyo amesema anatarajia makubwa kutoka kwa wachezaji hao lakini zaidi ni kuwapa ushirikiano na wao kujituma.

Katika mechi hiyo ya kirafiki dhidi ya Shinyanga Stendi, Simba ilishinda hilo bao 1-0 likiwa limefungwa na Mrundi huyo.

Simba inatarajia kuanza Ligi Kuu Bara keshokutwa dhidi ya Rhino Rangers ya Tabora ambayo ndiyo imepanda daraja msimu huu.