MAKALA: HAT TRICK YA SUAREZ, MAAJABU YA HAZARD NA MAUMIVU YA NYUMBANI

Na Saleh Ally

Wakati Luis Suarez akiiadhibu Norwich City kwa kupiga mabao manne, Liverpool iliposhinda kwa mabao 5-1 na Eden Hazard akionyesha kiwango cha juu na kushitua wakati Chelsea iliposhinda 4-3 dhidi ya Sunderland, maswali kibao yakajaa kichwani mwangu.

Hiyo ni hat trick ya tatu ya Suarez dhidi ya Norwich, yaani kila msimu amefunga mabao matatu kila alipokutana na timu hiyo bila kujali anacheza ugenini au nyumbani Anfield.

Kwa Hazard kilikuwa ni kiwango cha juu sana, uwezo aliouonyesha ulimshangaza kila aliyeshuhudia mechi hiyo. Zaidi ya mara moja mtangazaji alieleza wazi kuhusiana na kiwango cha kushitua cha Hazard ambaye wakati mwingine aliwachambua mabeki hadi wanne na kutoa pasi murua au kufunga.

Kufanya vizuri kwa Hazard na Suarez si kitu kibaya, lakini nilichoangalia ni namna ambavyo wachezaji wageni wanavyoweza kufanya vizuri England, halafu nikajiuliza kama kweli Tanzania yote haiwezi kuwa na wachezaji wenye uwezo huo. Ninaamini wapo.

Kama wapo, vipi washindwe kufanya vizuri? Naamini angalau nusu ya kinachofanywa na washambuliaji hao, inawezekana kufanywa na wachezaji kutoka Tanzania.

Kwani Watanzania wataendelea kuwashangilia wengine hadi lini? 

Nani anasikia uchungu wa utaifa kwamba kuna kitu kinaweza kufanyika na mwisho Watanzania wafike mbali na hatimaye kuisaidia nchi yetu kuendelea kuvikuza na kuvilinda vipaji vinavyokufa bila ya hatia kwa ajili ya sisi kutokuwa makini au tamaa ya mtu mmoja mmoja?

Unaweza kusingizia malezi ya familia ya kitajiri kwa akina Suarez na Hazard, lakini jibu ni hapana. Angalia, Hazard hajatokea katika familia ya kitajiri kwa kuwa baba yake mzazi, Henry na mama yake Carine wote walikuwa wanasoka.

Baba yake alicheza daraja la pili na mama yake alikuwa mshambuliaji hatari wa timu ya daraja la pili, aliamua kuacha soka baada ya kufikisha miezi mitatu ya ujauzito wa Hazard.

Suarez ndiye amekulia maisha ya shida zaidi kwao Uruguay, hakuwa na malezi mazuri ya familia, maana wazazi wake walitengana mapema kabisa. Maana yake hawa si matajiri, hivyo suala la fedha au kutokea familia za kitajiri, tunalifuta.

Tukirudi kwenye mifumo, basi inaonyesha hivi; wachezaji wanatakiwa kukulia katika malezi mazuri ya soka lakini kingine muhimu ni wachezaji kuamini kwenye kujituma na kufikia ndoto zao.

Tanzania tuna viongozi wengi wabinafsi, wanaotaka kuendeleza majina yao, matumbo na familia zao binafsi bila kujali wanauangamiza kwa kiasi kikubwa mchezo wa soka.

Lakini wachezaji wenyewe pia ni tatizo, kwamba wengi si waelewa na inaonekana mfumo wa malezi yao kabla ya kufikia leo kuwa nyota ni tatizo kubwa kwao.

Si waelewa, walalamishi, wavivu na wasiopenda kujituma. Lakini bado wengi wanaona kucheza Yanga au Simba, ndiyo mwisho wa safari.

Hakuna ubishi, pamoja na uwezo walionao. Suarez na Hazard lazima wamefanya kazi ya ziada ikiwa ni pamoja na kujituma lakini kulenga kufikia ndoto zao ambazo wamekuwa wakitamani kuzifikia tangu wakiwa watoto.

Viongozi na wachezaji wetu, wengi hawana ndoto za kufanya kitu fulani na mawazo mengi ni kucheza Ulaya bila ya kuwa na juhudi zozote.

Ukiangalia vipaji vya watoto na vijana, kweli ni vingi na vya juu. Lakini mara nyingi wanaishia njiani na hiyo ni picha tosha kwamba hakuna mfumo mzuri kuanzia katika ngazi za klabu kusaidia kuvikuza na kuviendeleza vipaji.

Kuna ule msemo wa “kutaka kwenda peponi kabla ya kufa”. Hili ndilo Watanzania wengi tumekuwa tukilitanguliza. Tunataka kupata mafanikio makubwa kwa wiki moja, wakati wenzetu wanapambana kwa miaka ili kuyapata.

Hatupendi kusubiri, hatupendi kukipika kitu, badala yake tunapendelea kula tu, ikiwezekana bila ya kuivisha. Jiulize, kuna vijana kweli wanataka kufikia walipo wachezaji hao wa Liverpool na Chelsea?

Inawezekana wako wachache sana wanaotaka kufikia kwa akina Hazard na Suarez na uwezo unawaruhusu, kama wakipewa moyo na kusaidiwa kufika mbele. Lakini nao wamekuwa wakiishia njiani na kukata tamaa kutokana na kukatishwa tamaa na rundo la lawama bila ya kuwa hata na chembe ya kupewa moyo.

Wizi wa viongozi wengi kwenye soka pia ni tatizo. Wanauua mpira pamoja hao vijana. Halafu wanatumia maneno ya ujanja kuonyesha wao ndiyo wanaonewa na wapo wanaowaunga mkono, mwisho Tanzania tunabaki kuwa watazamaji na kusifia mazuri ya akina Suarez na Hazard, milele!