TAMBWE, MUSOTI WAWATUMIA SALAMU COASTAL

TAMBWE KAZINI

Mshambuliaji wa Simba, Amissi Tambwe na beki wa kati, Donald Musoti, wametamba kuwa lazima wawakalishe Coastal Union katika mechi ya Ligi Kuu Bara, keshokutwa Jumapili kwenye Uwanja wa Taifa jijini Dar es Salaam.

Timu hizo zinakutana ambapo Simba ina pointi 36 na ikiwa inashika nafasi ya nne kwenye msimamo wa ligi, huku Coastal ikiwa nafasi ya saba ikiwa na pointi 26.

Tambwe amesema kuwa hana hofu na beki wa Coastal, Juma Nyosso kwa kuwa anaamini ni beki wa kawaida kwake.

“Nimejipanga vizuri, sina hofu na Nyosso, kwanza ni wa kawaida hanitishi kwa lolote, ninajiamini kuwa nina uwezo wa kuisaidia timu yangu kupata ushindi.”

Upande wa Musoti, raia wa Kenya, alisema anaamini Simba ipo sawa na haoni kinachoweza kuzuia ushindi wao katika mechi hiyo. “Tupo tayari na ‘gemu’ hiyo na hakuna wa kuhofia, labda kilichosubiriwa ni siku ya kukutana,” alisema Musoti.