WACHEZAJI SIMBA WAMLILIA BETRAM MWOMBEKI

Uamuzi wa  Kocha Mkuu wa Simba, Zdravko Logarusic raia wa Croatia kutomtumia kwenye mechi za Ligi Kuu Bara, mshambuliaji Betram Mwombeki kimewahuzunisha baadhi ya wachezaji wa Simba wakidai kuwa wanahitaji msaada wa mchezaji huyo uwanjani.

Mwombeki aliyekuwa moja ya wachezaji tegemeo kwenye kikosi cha Simba katika mzunguko wa kwanza wa ligi kwa sasa amepoteza nafasi hiyo tangu kutua kwa Loga kwenye mzunguko wa pili wa ligi.

Wachezaji hao ambao hawakutaka kutajwa majina yao gazetini walizungumza na Championi Jumamosi kwa hisia kali juu ya suala hilo.

“Yaani sijui hata kwa nini jamaa hatumiki sasa hivi wakati ni msaada mkubwa sana kwenye mechi zetu, muda mwingine unaona kabisa jinsi gani anapambana kule mbele akitumia uwezo wake wa ziada aliojaaliwa nao, ila ipo siku uwezo wa Mwombeki utakubalika tu,” alisema mchezaji mmoja.

“Kiukweli kabisa hakuna mshambuliaji mpiganaji kama yeye katika hizi timu za ligi za Bongo, kama kipindi kile alipokuwa anacheza na Amissi Tambwe kule mbele, yaani mipira ilikuwa inakaa halafu alikuwa anasaidia kwenye kupiga mashuti,” aliongeza mwingine.

Loga alikaririwa hivi karibuni akisema kwamba sababu kubwa ya kutomtumia Mwombeki ni kuumia mara kwa mara kunakomfanya mara nyingi kutokuwa fiti, hivyo kushindwa kucheza dakika nyingi uwanjani.

SOURCE: CHAMPIONI JUMAMOSI