STRAIKA MTIBWA SUGAR ANG'ARA SAUZ

LUIZIO AKIWA NA UZI WA AMAZULU WAKATI WA MAJARIBIO NCHINI AFRIKA KUSINI (PICHA KWA HISANI YA ABRAHAM RICE)

Mshambuliaji wa Mtibwa Sugar Juma Luizio amefanya majaribio katika timu ya Amazulu inayoshiriki Ligi Kuu Afrika Kusini na

kuwavutia benchi la ufundi la timu hiyo.

Luizio alifanyiwa ‘mchongo’ huo na Mtanzania anayeishi jijini Mwanza anayeitwa Jacob Kabole.

“Huyo ndiye kawafanyia mpango na Luizio amefanya vema katika majaribio ya hapa Amazulu,” kilieleza chanzo cha habari kutoka Afrika Kusini.

“Pamoja na Luizio kulikuwa na kijana anaitwa   Kheri Mohamed Khalifa anayechezea Toto Africans na wote wamefanya vema, majibu yanasubiriwa.

“Baada ya Amazulu walipelekwa Martzburg ambayo walifanya siku tano tu, hawakumaliza likaingia suala la ligi, hivyo wameambiwa warejee baada ya Kombe la Dunia kumalizia majaribio.”

Alipotafutwa Luizio jana, alisema: “Niko katika sehemu ambayo siwezi kuzungumza.”

Gazeti hili likafanya juhudi ya kumtafuta Kabole ambaye pia alisema yuko kwenye kikao asingeweza kuzungumza.

Luizio ni kati ya wachezaji waliounda kikosi cha Young Taifa Stars ambacho kwa mara ya kwanza kiliteuliwa na kocha Kim Poulsen.