SIMBA SASA YAMFUATA KIUNGO MRUNDI ANAYEKIPIGA IVORY COAST

Simba sasa imeamua kuvuka mipaka, imefunga safari hadi nchini Ivory Coast na kumshawishi kiungo Kwizera Pierre kutua nchini na kujiunga nayo.

Kwizera ni raia wa Burundi anakipiga katika kikosi cha Fad Abidjan pia ni kati ya viungo tegemeo wa timu ya taifa ya Burundi.

Taarifa za kuaminika kutoka ndani ya Simba zinaeleza Kwizera ambaye ana sifa ya kukaba sana, kupiga mashuti makali ndiye ameonekana chaguo sahihi badala ya Jerry Santo.

“Kamati ya usajili inaendelea kufanya juhudi za kumpata Kwizera, ikiwezekana anaweza kuwasili nchini Ijumaa kwa ajili ya mazungumzo na mambo yakiwa safi atasaini.

“Uongozi wa juu wa Simba pia umekuwa unafanya kazi kubwa na ushirikiano wa karibu na kamati ya usajili ikiwa ni kuhakikisha mambo yanakwenda vizuri,” kilieleza chanzo.

Hata hivyo, imeelezwa, Kwizera amekuwa na ndoto za kwenda kucheza soka la kulipwa barani Ulaya, lakini Simba imetumia ushawishi ili kuweza kumshawishi atue Msimbazi,” kilifafanua zaidi chanzo.

Kocha Zdravko Logarusic amekuwa akisisitiza kupatikana kiungo mkabaji ambaye atacheza yeye au Jonas Mkude na kuifanya Simba kuwa na uhakika katika nafasi hiyo.