KISIGA ASEMA OKWI HAPANA, AMPA UFUNGAJI BORA AMISSI TAMBWE

KISIGA (KATIKATI)

Kiungo mkongwe wa Simba, Shabani Kisiga, amefunguka kuwa, anaamini msimu huu mshambuliaji wa  kikosi hicho, Mrundi, Amissi Tambwe ataibuka kuwa mfungaji bora katika ligi na siyo Emmanuel Okwi.

Msimu uliopita, Mrundi huyo aliibuka mfungaji bora kwenye Ligi Kuu Bara baada ya kuifungia timu hiyo mabao 19 huku ukiwa ndiyo msimu wake wa kwanza.

 

TAMBWE

Kisiga ambaye amejiunga na Simba msimu huu akitokea Mtibwa Sugar, alisema Tambwe na Okwi wana uwezo mkubwa wa kufunga lakini yeye anampa nafasi zaidi ya kuibuka mfungaji bora Mrundi huyo kwa kuwa anapokuwa mbele ya lango huwa hafanyi makosa.

 

OKWI

Kisiga alisema kuwa hata hivyo anafurahia kuwaona nyota hao wakiwa pamoja kwani awali alidhani kuwa wangekuwa wabinafsi lakini alishangaa kuona wanashirikiana vizuri uwanjani.

“Msimu huu tunataka mabao mengi zaidi na nina imani kubwa na Tambwe kuwa anaweza kufunga mabao mengi na kuibuka mfungaji bora tena.

“Okwi ni mzuri lakini zaidi naona kama Tambwe akiwa mbele ya goli huwa hafanyi makosa, nafurahia uwepo wao uwanjani kwani wanashirikiana vizuri tofauti na nilivyokuwa nafikiria awali,” alisema Kisiga ambaye tayari ameifungia timu hiyo bao moja kwenye ligi.