Nahodha na beki wa kati wa
Simba, Mganda, Joseph Owino, amepatwa na msiba wa dada yake ambao utamfanya
achelewe kujiunga na Simba lakini mchezaji mwingine Mganda wa timu hiyo,
Emmanuel Okwi, naye pia ameomba kuendelea kubaki Uganda mpaka hapo atakapomaliza
matatizo yanayomuandama.
Okwi na Owino ndiyo
wachezaji pekee wa kimataifa wa Simba ambao mpaka sasa hawajajiunga na kikosi
cha timu hiyo tangu walipoenda mapumzikoni nchini mwao mapema mwezi Novemba lakini
wengine waliobakia ambao ni Warundi, Pierre Kwizera na Amissi Tambwe tayari
wameshatua nchini tangu Jumatano iliyopita.
Mratibu wa safari za wachezaji wa kimataifa klabuni hapo, Salim Swaka,
alisema kuwa wachezaji hao walipaswa kutua nchini kati jana au leo Jumatatu
lakini sasa haitawezekana baada ya kupata udhuru ambapo kila mmoja akiwa na
matatizo yake tofauti.
Alisema kwamba Owino
amefiwa na dada yake ambaye alikuwa akimuuguza, hivyo ameomba kuongezewa siku
zaidi kwa ajili ya kumaliza taratibu zote za mazishi kisha ndiyo atajiunga na timu
hiyo kwa ajili ya maandalizi ya mchezo wao wa Mtani Jembe dhidi ya Yanga
utakaopigwa Desemba 13, mwaka huu.
“Mara ya kwanza walitakiwa kuja ndani ya siku mbili hizi
yaani jana (juzi Jumamosi) na leo (jana Jumapili) lakini baada ya kutoa udhuru
wao huo kwa hiyo sasa tunawategemea kutua nchini kuanzia katikati ya wiki hii,”
alisema Swaka.
0 COMMENTS:
Post a Comment