SIMBA VS MTIBWA SUGAR, KAZI IPO LEO UWANJA WA TAIFA

Kivumbi na jasho cha Ligi Kuu Bara kinatarajia kuendelea tena leo katika viwanja vinne tofauti lakini mechi inayotupiwa macho zaidi na wapenzi wa soka hapa nchini ni ile ya Simba na Mtibwa Sugar itakayopigwa kwenye Uwanja wa Taifa jijini Dar es Salaam.

Mechi hiyo inatarajiwa kuwa na ushindani mkubwa kutokana na rekodi mbalimbali za timu hizo msimu huu ambapo katika mchezo wa kwanza uliozikutanisha mjini Morogoro, zilitoka sare ya bao 1-1 na hata kwenye fainali ya michuano ya Kombe la Mapinduzi iliyofanyika visiwani Zanzibar, Simba ilishinda kwa penalti 8-7.

Kikosi cha Simba kinachofundishwa na Mserbia, Goran Kopunovic, kitashuka katika mechi hiyo kikiwa na kumbukumbu ya kushinda michezo miwili iliyopita ambayo ni dhidi ya Prisons (5-0) na Yanga (1-0).

Simba sasa hivi wapo nafasi ya tatu kwenye msimamo wakiwa na alama 26 huku Mtibwa wakiwa na pointi 23, nafasi ya tano.

Kopunovic ameliambia Championi Jumamosi kuwa, wataingia uwanjani wakiwa na kazi moja tu ya kuhakikisha wanapata ushindi huku pia akilia kumkosa mshambuliaji wake, Ibrahim Ajibu ambaye anatumikia kadi tatu za njano.

“Itakuwa ni mechi ngumu kwani Mtibwa Sugar siyo timu mbaya lakini nimeshawaandaa vijana wangu kiufundi na kisaikolojia kuhakikisha wanapambana ili tuweze kupata ushindi.”

Naye Kocha Mkuu wa Mtibwa Sugar, Mecky Maxime, alisema: “Sina mengi ya kuongea juu ya mechi hiyo ila jambo la msingi ni kwamba tutaingia uwanjani kupambana ili tuweze kuibuka na ushindi kwani na sisi tunazihitaji hizo pointi tatu.”

Mechi nyingine zitakazochezwa leo ni Prisons dhidi ya Stand United kwenye Uwanja wa Sokoine, Ruvu Shooting itapambana na Coastal Union (Mabatini) na Polisi Moro itakabiliana na JKT Ruvu (Jamhuri).