SIMBA WASISITIZA KUITAKA NAFASI YA PILI LIGI KUU

ISIHAKA

Nahodha wa kikosi cha timu ya Simba, Hassan Isihaka, ametamka wazi kuwa ndoto zao kwa sasa ni kuona kikosi hicho kinamaliza katika nafasi ya pili ili kuweza kujikatia tiketi ya kushiriki mashindano ya kimataifa.

Mara ya mwisho kwa kikosi hicho cha Simba kushiriki mashindano ya kimataifa ilikuwa misimu mitatu iliyopita ambapo walitolewa na Clube Desportivo do Libolo FC ya Angola.

Isihaka amesema kwa sasa wameelekeza nguvu zao katika kuhakikisha kikosi hicho kinamaliza katika nafasi ya pili katika msimamo wa ligi ili kuweza kupata nafasi ya kushiriki michuano ya kimataifa ambapo kwa kipindi kirefu wamekuwa watazamaji.

“Kwa sasa tumejitolea wachezaji wote kupigana kwa nguvu zetu katika kila mechi ili kupata matokeo mazuri ambayo yatatusaidia katika harakati za kuweza kumaliza katika nafasi ya pili kwenye msimamo wa ligi kuu.

“Tumepania kumaliza katika nafasi hiyo ili kuweza kuirudisha tena timu katika mashindano ya kimataifa ambayo kwa kipindi kirefu sasa tumekuwa watazamaji tukiwaacha wapinzani wetu Yanga na Azam washiriki,” alisema beki huyo.