AZAM TV YAZINDUA KWA MARA NYINGINE KWETU HOUSE

Kampuni ya Azam Media, jana ilitangaza rasmi kuanza kwa michakato ya msimu wa pili wa Kwetu House utakaokuwa na vitu vingi vipya vitakavyoongeza utamu wa shindano hilo linalotarajiwa kuruka hewani kwenye stesheni za Azam.

Uzinduzi huo wa shindano hilo ambalo safari hii litajumuisha jumla ya mikoa mitano zaidi kwa ajili ya kunogesha na kuleta upinzani wa kutosha, ulifanyika kwenye Ofisi za Azam zilizopo Tazara jijini Dar.

Mkurugenzi wa Azam, Rhys Torrington, alifafanua baadhi ya mambo, ikiwemo jinsi ya kuwapata washiriki wa shindano hilo ambalo hujumuisha zaidi wapenzi wa soka na kuweka wazi kuwa msimu huu mshindi ataondoka na kitita cha shilingi milioni 15, tofauti na msimu uliopita ambao ilikuwa Sh milioni 10.

“Msimu huu kutakuwa na vitu vingi zaidi kwa ajili ya kuboresha na kuyanogesha haya mashindano, kutakuwa na jumla ya washiriki 20 wakijumuishwa wanawake pia. Vilevile msimu huu wataongezeka washiriki kutoka mikoa ya Mbeya, Dodoma, Arusha, Mwanza, Dar na hata Zanzibar.

“Mchujo wa kutafuta washiriki utafanyika katika kipindi chote cha Juni na kisha shindano lenyewe litachukua siku 45, kwa ajili ya kujua zaidi kuhusiana na mchujo tunaomba Watanzania waendelee kuangalia stesheni za Azam kwa ajili ya kupata taarifa zaidi,” alisema Torrington.