KAKA WA VENGU ASEMA SOON MSANII HUYO ATAINGIA MZIGONI

Msanii maarufu wa Kundi la Orijino Komedi, Joseph Shamba ‘Vengu’, yupo mbioni kurudi mzigoni baada ya hali yake ya kiafya kuendelea vizuri.

Kwa muda mrefu Vengu alikuwa haonekani katika kundi hilo la vichekesho kutokana na kuugua kwa muda mrefu lakini hivi sasa afya yake imedaiwa kuimarika.

Kaka wa Vengu, Andrew Shamba ambaye pia ni Mwamuzi wa Ligi Kuu Bara, alisema kuwa mdogo wake huyo anaendelea vizuri na muda wowote ataungana na wenzake.

“Tunamshukuru Mungu ndugu yetu anaendelea vizuri kabisa na muda wowote ataungana na wenzake kuendelea na kazi yake ya vichekesho.

“Kwa sasa yupo nyumbani kwake Kigamboni akiendelea na ratiba yake ya mazoezi ya kila siku ambayo alipewa baada ya matibabu aliyofanyiwa nchini India,” alisema Shamba.

Aliongeza: “Kwa sasa haruhusiwi kuonekana hadharani mpaka hapo muda wake wa mazoezi utakapokuwa umemalizika na hiyo ni kutokana na kumuepusha na watu wanaoweza kumkumbusha mambo yaliopita ambayo husikitisha sana na kumfanya awe na mawazo mengi.”