HATA SASA HAKUNA ANAYEMSHUKURU WENGER, HAKUNA ANAYEMPONGEZA…!!!

Na Saleh Ally

KATI ya mwaka 1956 au 1957, Arsene Wenger alikuwa kati ya vijana katika Kijiji cha Duttlenheim nchini Ufaransa waliokuwa wakilazimika kulipa pauni 1 (Sh 2200) kwa ajili ya kuangalia mechi za Kombe la FA.

 Wenger ameeleza kwamba walikuwa wakilipa fedha hizo na kupata nafasi kuangalia michuano hiyo huku wakishangazwa na namna mpira ulivyokuwa ukiteleza vizuri katika nyasi.

“Zilikuwa ni nyasi ambazo hatukupata kuziona, zilionekana na sura ya mvuto, ziliteleza vizuri na ilikuwa raha sana kuona.

“Televisheni ya kijiji ya ‘black and white’ ilikuwa maarufu sana. Kwetu hakukuwa na televisheni hadi nilipofikisha miaka 15, wazazi wangu walifanikiwa kununua,” anasema Wenger.

 Sasa Wenger ni shujaa wa Kombe la FA, anakuwa kocha pekee katika karne hii aliyefanikiwa kubeba kombe hilo mara sita.

Kombe kongwe na lenye heshima kubwa ndani ya England, Wenger amefikisha mara sita na kumfikia George Ramsey ambaye aliifundisha Aston Villa tangu mwaka 1884 hadi 1926.

Ndani ya miaka hiyo 42 ndiyo Ramsey alifanikiwa kubeba Kombe la FA mara sita. Wenger amefanikiwa kubeba kombe hilo mara sita ndani ya miaka 19, kumbuka alitua Arsenal mwaka 1996 akitokea Grampus Eight ya Japan. Wakati huo Alex Ferguson alikuwa anatimiza mwaka wa 10 tangu ajiunge na Manchester United aliyojiunga nayo akitokea Aberdeen ya Scotland.

Katika miaka hiyo 19, pia Wenger amebeba ubingwa wa England mara tatu. Pia ameiwezesha Arsenal kukusanya Ngao za Jamii mara tano.

 Wenger sasa ameweka rekodi ya kuiongoza Arsenal kufikisha makombe 12 ya FA ambayo ni mengi zaidi kwa klabu. Pia ndiye kocha mgeni kutoka nje ya Uingereza kubeba makombe mengi zaidi.

Wakati akizungumza na waandishi wa habari, aliwachekesha baada ya kusema hajui hata medali zake tano za nyuma zilipo, lakini alikumbuka chache tu alipoeleza alizitoa katika shughuli za kusaidia jamii, ziuzwe kama sehemu ya mchango wake.

 Lakini aliwafurahisha aliposema kwamba, nyingine huenda wale vijana ambao wamekuwa wakifanya usafi kwake, huenda ‘walizipitia’ na kusisitiza, yeye si mtu mzuri katika kazi ya kuhifadhi kumbukumbu.

Wenger ni kocha ambaye unaweza ukamzungumza kwa njia zote na suala la ubora haliwezi kuwa mbali naye kwa kuwa amefanya mengi ambayo inawezekana hata kocha mmoja hakuwahi kufanya katika dunia ya mchezo wa soka.

 Mfano mzuri, alikuwa akichukua wachezaji walioonekana hawawezi tena, wamekwisha au ni mizigo, halafu anaanza kuwasuka upya kabla ya kuibuka na kuwa tishio.

Mfano mzuri ni Thierry Henry ambaye alimtoa Juventus ya Italia akionekana hakuwa na nafasi. Waitaliano hao walimnunua kutoka AS Monaco, lakini kufika pale akakwama. Wenger akamtoa na kumuinua, wako wengi.

 Lakini inawezekana Wenger ndiye kocha anayeongoza kwa kuwaamini wachezaji makinda ambao baadaye wanaibuka na kuwa tegemeo wa Arsenal. Unawajua akina Nicholas Anelka, Cesc Fabregas na wengine kibao kama Theo Walcott aliyemnunua akiwa kinda kutokea Southampton, kinda wa miaka 17 akampa nafasi ya kucheza kikosi cha kwanza. Msimu ujao atakuwa lulu ya dunia kwa kuwa baada ya kurejea ameonyesha tayari ni hatari.

Wenger pia anaweza kuwa kocha aliyebana matumizi kuliko mwingine yeyote na bado akapata mafanikio ya juu zaidi. Arsenal ilikuwa lazima ibane matumizi kutokana na madeni makubwa yakiwemo yale ya Uwanja wa Emirates.

 Pamoja na kubana matumizi hayo, Arsenal imeendelea kuwa katika tano bora ya timu tajiri duniani. Imebaki katika nne bora ya Ligi Kuu England na inapata nafasi ya kushiriki Ligi ya Mabingwa Ulaya.

 Huyu babu afanye nini hasa? Makinda amewainua, faida ameingiza na hata makombe ya FA anaongoza, Ligi Kuu England amechukua matatu. Awape nini Arsenal ili wamwamini na kuona shujaa kwao?

 Huenda hata Ferguson alionekana hana faida sana wakati akiwa Manchester United. Kuondoka kwake, leo ni gumzo licha ya uwepo wa kocha wa sasa. Inaonekana viatu vyake, kazi kubwa kuvalika.

 Kwa hali inavyokwenda, siku Mfaransa huyo mwenye miaka 56 akiamua kuondoka Arsenal, wa kuvaa viatu vyake, ili aendane na mfumo wa Arsenal itakuwa kazi kubwa na tatizo kwa Arsenal.

 Huenda, huu ulikuwa wakati mzuri na mwafaka kwa mashabiki wa Arsenal wakiwemo wale wa Dar es Salaam hadi Mwanza, Lindi hadi Mara au Tanzania nzima na duniani kote pia kuonyesha kwamba kocha huyo naye ana mchango mkubwa.

 Hii ni kwa kuwa, sifa nyingi za ubingwa wa FA kwa mara ya pili mfululizo kwa misimu miwili iliyopita zinaonekana kwenda kwa waliofunga mabao.

Zinaonekana kwenda kwa mabeki na viungo waliocheza vizuri, lakini si kwa Wenger na siku Arsenal ikiharibu, utasikia mzigo wote anaangushiwa yeye. Kuna wakati najiuliza, labda Wenger ni Mnyamwezi?