SIMBA SASA HAISHIKIKI ZANZIBAR, YAITWANGA KMKM 3-2 AJIBU, KIIZA WAKING'ARA NYAVUNI

Simba imeibuka na ushindi wa mabao 3-2 dhidi ya KMKM ya Zanzibar.

Mechi hiyo imepigwa leo kwenye Uwanja wa Amaan mjini Zanzibar na KMKM ndiyo ilitangulia kushinda.

Matheo Anthony ‘rasta’ ndiye alitangulia kuifungia KMKM katika dakika ya 25 na 35 lakini baadaye Msimbazi wakaanza kurudisha majibu.

Hamisi Kiiza aliisawazishia Simba katika dakika ya 41, hivyo timu zikaenda mapumziko KMKM 2, Simba 1.

Kipindi cha pili, vijana wa Dylan Kerr walionekana kucheza kwa kasi zaidi na kufanikiwa kupata bao la pili katika dakika ya 74, Ibra ‘Cadabra’ Ajibu akifunga baada ya kuunganisha pasi safi ya Mwalyanzi.

Wakati KMKM wanajiuliza imekuwaje, Ajibu tena aliipatia Simba bao la tatu katika dakika ya 77 akiunganisha krosi safi ya Mwinyi Kazimoto aliyekuwa ameingia kuchukua nafasi ya Kiiza.

Simba imeendelea kuchukua ushindi katika mechi zake zote za kirafiki za hapa Zanzibar.