CANNAVARO: KAMUSOKO ALITUTULIZA, TUKACHEZA SOKA SAFI KABISA

Wakati wapenzi na mashabiki wa Yanga wakiendelea kusherehekea ushindi waliopata juzi Jumamosi dhidi ya Simba, imefahamika kuwa chanzo cha ushindi huo ni kiungo wao wa kimataifa kutoka Zimbabwe, Thabani Kamusoko.

Katika mechi hiyo iliyokuwa na ushindani mkubwa, Yanga iliitandika Simba mabao 2-0 na kufanikiwa kuvunja mwiko wa kunyanyaswa na timu hiyo kwa kipindi cha miaka miwili.

Nahodha wa Yanga, Nadir Haroub ‘Cannavaro’, amesema kuwa, busara za Kamusoko ndizo zilizosababisha wakaibuka na ushindi katika mchezo huo.

Alisema Kamusoko alifanya kazi kubwa sana ya kuwatuliza wachezaji wenzake wa Yanga, hususan Cannavaro mwenyewe na Kelvin Yondani ambao katika dakika 15 za kwanza, walicheza kwa presha kubwa huku wakijichanganya kila wakati.

“Baada ya Kamusoko kuona vile, alitutaka tutulie na tusiwe na presha, tucheze kwa kujiamini kama siku zote na tukifanya hivyo lazima tutashinda.

“Kusema kweli tulimsikiliza na tufakanya hivyo na mwisho wa siku mambo yalikuwa mazuri kwetu na tukafanikiwa kuibuka na ushindi,” alisema Cannavaro na kisha kuongeza kuwa anawashukuru viongozi wake wa Yanga kwa usajili wa Kamusoko na Donald Ngoma, kwani kazi yao inaonekana uwanjani.